Luke 13
A Viri i Uka Ma i Pulo a Vilona Bara i Velu
1A bakovi ranga ri laho turane Isu ri vakalongoa vona tara maki. E Pilato i rabalaki ranga bakovi o Galili na tahuna ri habi a nihabi na Vure. 2 aE Isu i koli i ta maea, “Naha ni luhoi e huriki nga, ra ri mate, ri hale hateka ne huriki a bakovi a ngatavine ranga o Galili a vuhuna ri bole a vuranga iea. 3Pali mua ranga, i uka ma mu gu pulo a vilone mua, bara mu vurua.” 4E Isu i tuverei tabu, i ta maea, “Re huriki a bakovi a ngatavine ala ravulu a polona i polotolu, ri mate na tahuna a roho dagi o Silom i mapuka taho ria. Naha ni luhoi e huriki nga ri hale hateka ne huriki ranga ri made vonga o Ierusalem. 5Pali mua ranga, i uka ma mu gu pulo a vilone mua, mua ranga bara mu vurua.”A Nivakakika na Kai i Uka Vuana
6Muri i takia ne ria a nita vakakika iea: “A bakovi tara i varo a kai a pik na hania na vain vona. I lokovonga bala, i leia, ta ge pasi a kanena kai iea, pali i uka kanena. 7 bLakea i takia a vora i matakari a hania na vain vona, i ta maea, ‘Na pida i tolu a valai ta ga pasia a pik, pali i uka ma matavisia tara kanena. I navai ge pesi tavula na malala kamumu iea? O tolo vurokia ngane!’8 c“Lakea a vora i koli i ta maea, ‘Bakovi Dagi, ge pesi taro na pida ge taku. Ga kado haluia, ga mugo rikea a malala vakuloi vona. 9Ge vua, bara i kamumu hateka! I uka ma ge vua, bara tolo vurokia.’”
A Ngatavine i Beu
10Na Parava Nimalo e Isu i vara na roho na vaponga tara. 11A ngatavine tara vonga i ratapilea a hanitu na pida i ravulu a polona i polotolu, i keri ni laho kamumu. I poku a bitona, i keri ni pesi tavaga rike. 12Na tahuna e Isu i masia, i gale lokomugea vona, i takia, “Ngatavine, ngane i lobo a gilanga vomu.” 13Muri i padoia. I malaviriri kunana i tavaga rike, i vakatubu ni kavurikea a Vure.14 dPali a matakari na roho na vaponga i madihi a hatena, a vuhuna e Isu i koria a ngatavine na Parava Nimalo. Lakea i taki e huriki i ta maea, “A parava i polotara a parava na leho. Mu valai koea ni gi kori mua na gilanga na parava nga. Pali na Parava Nimalo mu made kunana.”
15 eLakea e Bakovi Dagi i koli i ta maea, “Mua o huriki a bakovi na taminga! Ra mua, na Parava Nimalo mu puga vuroki kilala a mota ni kolotata a bulmakau vona, muri mu vakaninu. 16Ra ngatavine iea, ia a hamone Abraham. I ratapilea e Satan na pida i ravulu a polona i polotolu. Pali ge navai, i uka ma ni gi kori na Parava Nimalo?”
17Na tahuna i taki loboa a ngava iea, e huriki a gimana ri rare. Pali e huriki lobo ri vivi vona a maka maki kamumu hateka e Isu i rata.
A Kai a Mastad
(Mateo 13:31-32; Markus 4:30-32)
18Muri e Isu i taki e huriki, “A harikianga na Vure i manga a ra? Ga toni virihi a ra maki vona? 19I manga a vutuna a mastad i varoa a bakovi na hania vona. I koru rike dagi, i manga a kai. A maka kadirovo ri bebe valai, ri hae a nune ria na rahana.”A Nivakakika na Is
(Mateo 13:33)
20Muri i nana tabu, “Ga toni virihi a ra maki tabu vona a harikianga na Vure? 21I manga a is i bolea a ngatavine, i pulo turana kabukuna plaoa, muri i pugaga.”A Logo Kiroko
(Mateo 7:13-14; 7:21-23)
22E Isu i tabana ni laho sike o Ierusalem, i laho dili na maka tanga, i vara e huriki. 23A bakovi tara i nanea, “Go korimule e huriki a bakovi a ngatavine ala riva? Ri gi ala popote kunana?”E Isu i koli, i ta maea, 24“Mu toni a bulune mua ni dili vona a logo bala holoholo. A taki muholi mua, i kupo e huriki ri gi toni ni dili, pali bara ri keri. 25 fNa tahuna a tahona roho i pesi rike, i tukaria a logo, bara mu pesi rare polovavo mu gale gale, bara mu ta maea, ‘Bakovi Dagi, mi gi dili.’
“Pali ia bara i koli i ta maea, ‘Iau i uka ma lohoka ne mua, mua a viri vai?’
26“Muri bara mu ta maea, ‘Hosi o vara na mada na tanga ne mia, mi kani, mi ninu turamu.’
27 g“Pali ia bara i koli tabu, i ta maea, ‘Iau i uka ma lohoka ne mua, mu a viri vai? Mu malele ha nau, mua e huriki a mari ni rata a naro hale!’
28 h“Muri ma bara mu matai e Abraham, e Isak, e Iakop turana e huriki a propet lobo ri dili na harikianga na Vure. Pali mua bara ni lili tala, lakea bara mu tangi, i madihi a hatene mua, mu kara tata mavonga a ngine mua. 29 iE huriki bara ri valai na tanga lobo na malala, ri gi made na murine ria na habu dagi na harikianga na Vure. 30 jMuholi hateka, e huriki ranga ri muri ngane bara ri muga. E huriki ranga ri muga ngane bara ri muri.”
E Isu i Dodoa e Ierusalem
(Mateo 23:37-39)
31Na parava iea kunana, e huriki a Pariseo ranga ri valai ne Isu ri takia ri ta maea, “O ha taroa a tanga iea o lakea na hini ranga, a vuhuna e Herod i ngaru ni rabalaki ioe.”32E Isu i koli i ta maea, “Mu vano mu takia a huluvonga iea, ‘Ga lili tala taro a maka hanitu, ga korimule e huriki ri giloa na parava i rua. Na toluna parava bara vakaloboa a leho nau.’ 33Pali ngane, kuduvi, girira bara laho lokovonga o Ierusalem, a vuhuna a propet i uka ma ge mate na tanga tara. A propet bara i mate kunana o Ierusalem!”
34Muri e Isu i ta maea, “Ierusalem, Ierusalem! Mu rabalaki e huriki a propet, mu padimate na kedo e huriki a rudu valai ne mua. Balaka kupo a ngaru ni kalipopo palupu mua, i manga a kinana kureko i kavitagu a maka tuna na karapana, ga matakari mua. Pali mu koi mua. 35 kA Vure i pea pali a roho ne mua. Ngane a taki mua, i uka ma mu gu matai tabu iau ge harena na parava mu gu ta maea, ‘Si gi kavurikea a viri i valai na rane Bakovi Dagi.’”
Copyright information for
BNP